Հայաստանն ու Սլովենիան նոր հնարավորություններ են բացում միջազգային ներդրողների համար
«Էնթերփրայզ Արմենիա»-ն և «Սփիրիթ Սլովենիա»-ն ստորագրել են փոխըմբռնման հուշագիր՝ ուղղված ներդրումային համագործակցության զարգացմանն ու Հայաստանի և Սլովենիայի միջև տնտեսական կապերի ամրապնդմանը։
Հուշագիրը ստորագրել են «Էնթերփրայզ Արմենիա»-ի գլխավոր գործադիր տնօրեն Գոհար Աբաջյանը և «Սփիրիթ Սլովենիա»-ի գործադիր տնօրեն Տամարա Զայեց Բալաժիչը՝ Հայաստան կատարած պաշտոնական այցի շրջանակում։ Ստորագրման արարողությանը ներկա է եղել նաև Չեխիայի Հանրապետությունում Հայաստանի Հանրապետության արտակարգ և լիազոր դեսպանն Աշոտ Հովակիմյանը։
Միջոցառման ընթացքում «Էնթերփրայզ Արմենիա»-ի գլխավոր գործադիր տնօրեն Գոհար Աբաջյանը կարևորել է նման գործընկերությունների ինստիտուցիոնալացումը և նշել.
«Այս համաձայնագիրը կարևոր փուլ է մեր երկրների համագործակցության ընդլայնման գործում։ Ստեղծելով կայուն տնտեսական կամուրջներ՝ մենք բացում ենք նոր հնարավորություններ ներդրողների համար և ամրապնդում երկարաժամկետ գործընկերությունը Հայաստանի և Սլովենիայի միջև»։
Հուշագիրը նախատեսում է համատեղ ջանքեր գործադրել գործարար կապերի զարգացման, փոխադարձ ներդրումների խթանման և տնտեսական համագործակցության նոր ուղղությունների բացման համար՝ էլ ավելի ամրապնդելով Հայաստանի դիրքը որպես միջազգային ներդրողների համար գրավիչ երկիր։
