Անհատ ձեռնարկատերն այն ֆիզիկական անձն է, որն իրավունք ունի առանց իրավաբանական անձ կազմավորելու, ինքնուրույն, իր անունից և իր ռիսկով իրականացնել գործունեություն, որի հիմնական նպատակը գույք օգտագործելուց, ապրանքներ վաճառելուց, աշխատանքներ կատարելուց կամ ծառայություններ մատուցելուց շահույթ (եկամուտ) ստանալն է: Անհատ ձեռնարկատերերը պատասխանատվություն են կրում իրենց պարտավորությունների համար իրենց պատկանող ողջ անձնական գույքով, ինչը նշանակում է, որ քաղաքացին անձամբ պատասխանատու է առևտրային գործունեությունից բխող ցանկացած պարտավորության համար:

Սահմանափակ պատասխանատվությամբ ընկերություն է համարվում մեկ կամ մի քանի անձանց հիմնադրած ընկերությունը, որի կանոնադրական կապիտալը բաժանված է ընկերության կանոնադրությամբ սահմանված չափերով բաժնեմասերի: Ընկերությունը որպես սեփականություն ունի առանձնացված գույք և իր պարտավորությունների համար պատասխանատու է այդ գույքով, կարող է իր անունից ձեռք բերել և իրականացնել գույքային և անձնական ոչ գույքային իրավունքներ, կրել պարտականություններ: Հիմնադիրների միջև շահույթը բաշխվում է կանոնադրությամբ սահմանված կարգով:

Բաժնետիրական ընկերություն է համարվում առևտրային կազմակերպություն հանդիսացող այն տնտեսական ընկերությունը, որի կանոնադրական կապիտալը բաժանված է Ընկերության նկատմամբ բաժնետերերի պարտավորական իրավունքը հավաստիացնող որոշակի թվով բաժնետոմսերի: Ընկերությունն ունի իր բաժնետերերի գույքից առանձնացված գույք, որը հաշվառվում է ինքնուրույն հաշվեկշռում: Ընկերությունները կարող են լինել բաց և փակ, որը պետք է արտահայտվի Ընկերության կանոնադրության և ֆիրմային անվանման մեջ:

Ընկերակցությունը հանդիսանում է ոչ պակաս, քան երկու քաղաքացիների, իրավաբանական անձանց և իրավաբանական անձի կարգավիճակ չունեցող տնտեսական կազմակերպությունների այնպիսի կոլեկտիվ ձեռնարկությունը, որը ընկերակցության ստեղծման պայմանագրով նախատեսված տնտեսական և այլ գործունեություն իրականացնելու նպատակով միավորում է անհատական անդամությունը և գրանցած գործընկերների միջոցները: Ի տարբերություն ՍՊԸ-ի կամ ԲԸ-ի, որտեղ ընկերությունը կառավարվում է մեկ տնօրենի կողմից, ընկերակցությունը կարող է ակտիվ կառավարվել մի քանի գործընկերների կողմից:

Արտասահմանյան ընկերության մասնաճյուղն արտասահմանյան ընկերության տարածքային ստորաբաժանումն է Հայաստանում։ Արտասահմանյան ընկերությունը կարող է ընտրություն կատարել հայկական շուկա մուտք գործելու երկու եղանակների միջև։ Հնարավոր է ստեղծել դուստր ձեռնարկություն՝ առանձին իրավաբանական անձ (օրինակ՝ ՍՊԸ կամ ԲԸ), որն ամբողջությամբ կամ մասնակիորեն պատկանում է արտասահմանյան ընկերությանը, կամ արտասահմանյան ընկերությունը կարող է որոշել նաև Հայաստանում առևտրային գործունեություն իրականացնել մասնաճյուղի միջոցով։

Շահույթ չհետապնդող կազմակերպությունները քաղաքացիների կամավոր միավորումներ են, որոնք օրենքով նախատեսված կարգով անդամագրվել են նրանց շահերի ընդհանրության հիման վրա՝ հոգևոր կամ այլ ոչ նյութական կարիքները բավարարելու համար: Հիմնադիրների կամ մասնակիցների կողմից կազմակերպությանը փոխանցված գույքը հասարակական միավորման սեփականությունն է: Կազմակերպությունն այս գույքն օգտագործում է իր կանոնադրությամբ սահմանված կարգով:

Մասնավոր բաժնեմասնակցային ֆոնդը կազմակերպություն է, որն օգտագործվում է անշարժ գույքում, արժեթղթերում և այլ ակտիվներում ներդրումներ կատարելու համար: Ֆոնդի կանոնների կամ կանոնադրության համաձայն՝ ֆոնդի ակտիվների առնվազն 50 տոկոսը պետք է ներդրվի կարգավորվող շուկաներում առևտրին չթույլատրված արժեթղթերում: Մասնավոր բաժնեմասնակցային ֆոնդը գրանցվում է Հայաստանի Կենտրոնական բանկի կողմից և ունի զգալի հարկային արտոնություններ: