«Էնթերփրայզ Արմենիա» հիմնադրամի գլխավոր տնօրեն Լևոն Օհանեսյանն ու ներդրումների գծով տնօրեն Արամ Վարդանյանը մասնակցել են ս․թ․ հունիսի 20-22-ը ԱՄՆ Նյու Յորք քաղաքում անցկացված «Orion Summit 2023» ներդրումային գագաթնաժողովին։ Միջոցառումը միտված էր դիրքավորելու Հայաստանը որպես տարածաշրջանային ՏՏ հաբ և ներդրումների համար բարենպաստ ուղղություն, խթանել օտարերկրյա ներդրումները, ներկայացնել ոլորտի հաջողության պատմություններն ու ՏՏ ոլորտի խոստումնալից նախաձեռնությունները։

Միջոցառման շրջանակներում կայացել են առաջադեմ տեխնոլոգիաների, ներդրումային, տնտեսական, ֆինանսաբանկային թեմաներով և այլ մասնագիտական քննարկումներ։ Հանդիպումներ են տեղի ունեցել մի շարք ներդրումային ֆոնդերի, ընտանեկան գրասենյակների և այլ ֆինանսական կառույցների հետ։ Հանդիպումների ընթացքում քննարկվել են Հայաստանի էկոհամակարգի, ստարտափների զարգացման, ներդրումների ներգրավման, տեղեկատվական տեխնոլոգիաների, նորարարության, գիտության, կրթության նոր ծրագրերի, մի շարք այլ ուղղություններով համագործակցության հնարավորությունները: Միջոցառման ընթացքում «Էնթերփրայզ Արմենիայի» ներկայացուցիչները հանդես են եկել ելույթներով, և ներկայացվել է Հայաստանի ներդրումային դաշտի, ՏՏ ոլորտի գրավչությունների և գործարար հնարավորությունների վերաբերյալ շնորհանդես: