Հայաստանի ներդրումային հնարավորություններին նվիրված միջոցառում Աբու Դաբիում
Աբու Դաբիում ընթացող «Ամենամյա ներդրումային համաժողով 2023»-ի շրջանակում «Էնթերփրայզ Արմենիայի» կողմից կազմակերպվել է Հայաստանի ներդրումային դաշտին նվիրված միջոցառում:
Միջոցառմանը բացման խոսքով հանդես են եկել Արաբական Միացյալ Էմիրություններում Հայաստանի Հանրապետության արտակարգ և լիազոր դեսպան Կարեն Գրիգորյանը և ՀՀ էկոնոմիկայի նախարար Վահան Քերոբյանը:
«Էնթերփրայզ Արմենիայի» գլխավոր տնօրեն Լևոն Օհանեսյանն իր ելույթում ընդգծել է Հայաստանում ներդրումային միջավայրի բարելավման ուղղությամբ կառավարության ջանքերը, ինչպես նաև անդրադարձել «Էնթերփրայզ Արմենիայի» դերակատարմանը՝ դեպի Հայաստան նոր ներդրումներ ներգրավելու և ներդրումային ծրագրերի սահուն իրականացման գործընթացներում:
«Էնթերփրայզ Արմենիայի» ներդրումների խթանման և արտաքին կապերի ավագ մենեջեր Էդիկ Հարությունյանը միջոցառման ընթացքում ներկայացրեց Հայաստանի ներդրումային հնարավորություններին նվիրված շնորհանդես, որին հաջորդեց Հայաստանի արտահանման հնարավորությունները ներկայացնող տեսահոլովակի ցուցադրություն:
Հանդիպմանը ներկա էին ներդրողներ, գործարարներ, ներդրումների խրախուսման և միջազգային կառույցների ներկայացուցիչներ աշխարհի տարբեր երկրներից: Շնորհանդեսի միջոցով հանդիպման մասնակիցները ծանոթացան Հայաստանի ներդրումային դաշտին ու գործարար հնարավորություններին, օտարերկրյա ներդրողներին տրամադրվող պետական խթանների և արտոնությունների համակարգին, տնտեսության առանձին ճյուղերում ներդրումներ կատարելու առավելություններին :
Շնորհանդեսի առանցքային նպատակն էր օտարերկրյա գործարար համայնքի շրջանում բարձրացնել Հայաստանի՝ որպես գրավիչ ներդրումային ուղղության մասին իրազեկվածությունը, հաստատել նոր կապեր օտարերկրյա ներդրողների և գործընկեր կառույցների հետ:
Պատկերասրահ
