Կյանքը Հայաստանում
Բացահայտեք Հայաստանն իր հարուստ պատմական ժառանգությամբ և ողջ մշակութային գրավչությամբ․ վայր, որտեղ միախառնվում են հնագույն ավանդույթներն ու նորարարական մոտեցումները։
Ունենալով 10 միլիոնանոց սփյուռք ամբողջ աշխարհում՝ Հայաստանը բաց է բոլոր ազգերի ու մշակույթների համար և պատրաստ է այցելուներ հյուրընկալել աշխարհի բոլոր անկյուններից։ Հայ ժողովուրդը մշտապես կրում և բարձր է պահում հյուրընկալության արժեքներն ու հին ավանդույթները, որոնք ոչ միայն խորապես արմատավորված են հայերի սրտերում, այլև ամրագրված են ազգային առաջադեմ օրենսդրությամբ: Հայաստանն առաջարկում է ինչպես ապրելու, այնպես էլ բիզնես վարելու պարզեցված գործընթացներ՝ ապահովելով համահավասար վերաբերմունք օտարերկրացիների և ՀՀ քաղաքացիների նկատմամբ։
Հայաստանում ապրելու առավելությունները
Հյուրընկալություն
Հայաստան առաջին անգամ ժամանելիս տարաբնակները և զբոսաշրջիկները միանգամից նկատում են տեղացիների ջերմ հյուրընկալությունն ու բարյացակամությունը։ Հայերը հայտնի են իրենց հյուրամեծարությամբ և օտարերկրացիների հետ իրենց մշակույթով կիսվելու պատրաստակամությամբ:
Սնունդ
Հայկական խոհանոցն իր 2000-ամյա խոհարարական ավանդույթներով անտարբեր չի թողնում այցելուներին։ Այն հայտնի է յուրահատուկ այնպիսի ճաշատեսակներով, ինչպիսիք են հարիսան, ղափաման, խորովածն ու գաթան։
Կլիմա
Պայմանավորված երկրի բարդ ռելիեֆով՝ Հայաստանն ունի բազմազան կլիմայական գոտիներ։ Ամառները հիմնականում առանձնանում են արևոտ և չոր եղանակով, իսկ ձմեռները ցրտաշունչ են և ձնառատ: Հայաստանի մայրաքաղաք Երևանում միջին ջերմաստիճանն ամռանը կազմում է 30-ից 33 °C, իսկ ձմռանը` 1-ից 3 °C:
Անվտանգություն
Հայաստանը համարվում է օտարերկրացիների համար աշխարհի ամենաապահով վայրերից մեկը, ինչն ամրագրվում է նաև միջազգային վարկանիշներում: Բնակիչների և այցելուների համար անվտանգ միջավայրի պահպանմանն են նպաստում հանցավորության ցածր մակարդակն ու հանրային անվտանգության ապահովմանն ուղղված պետության հետևողական ջանքերը։
Կրթական համակարգ
Տարբեր երկրներից բազմաթիվ ուսանողներ գալիս են Հայաստան բարձրագույն կրթություն ստանալու և հետազոտական գործունեությամբ զբաղվելու նպատակով։ Հայաստանյան բուհերը տրամադրում են որակյալ ուսում և միջազգայնորեն ճանաչված գիտական աստիճաններ հասանելի կրթավճարներով։
Բնություն
Հայաստանյան բնությունը հիացնում է նմանը չունեցող բնապատկերներով ու տպավորիչ տեսարժան վայրերով։ Այցելուների կողմից ամենասիրված ուղղություններից են Գառնիի կիրճում գտնվող Քարերի սիմֆոնիան, Լոռու ձորը, «Դիլիջան» ազգային պարկը և Սևանա լիճը։
Հայոց լեզու
Հանդիսանալով հնդեվրոպական լեզվաընտանիքի առանձին ճյուղ՝ հայերենը հնագույն լեզու է, որը չի ծագել որևէ այլ լեզվից։ 1700-ամյա հայոց այբուբենն աշխարհում ամենազարգացածներից է, իսկ պատմական ձեռագրերում կարելի է գտնել հայերեն տառերի յուրահատուկ ձևավորում, որը կոչվում է թռչնագիր (թռչնաձև տառեր):
Ցանկալի և հասանելի կենսակերպ
