Անվտանգ և կանխատեսելի ներդրումային միջավայր ապահովելու Հայաստանի հանձնառությունն արտացոլված է ամուր իրավական դաշտի, միջազգային պայմանագրերին մասնակցության և ներդրող-պետություն վեճերի կարգավորման մեխանիզմների առկայության միջոցով: «Օտարերկրյա ներդրումների մասին» ՀՀ օրենքը սահմանում է օտարերկրյա ուղղակի ներդրումների (ՕՈՒՆ) կարգավորման հիմնական սկզբունքները և նախատեսում է ընդհանուր դրույթներ, որոնք կարգավորում են դրանց իրացման կանոններն ու ընթացակարգերը, դրանց պաշտպանությունն ու հասանելիությունը պետական խթաններին։ Տվյալ օրենսդրությունն օտարերկրյա ներդրողներին տրամադրում է պաշտպանության բարձր չափանիշներ և երաշխիքներ: Մասնավորապես՝ օտարերկրյա ներդրումները Հայաստանում պաշտպանված են օտարումից և ազգայնացումից՝ նման դեպքերում ապահովելով ամբողջական փոխհատուցում։ Ներդրողներին հասանելի են ներդրող-պետություն վեճերի կարգավորման ազգային և միջազգային մեխանիզմներ, ինչպես նաև տվյալ ներդրումները պաշտպանված են երկկողմ և

բազմակողմ միջազգային ներդրումային համաձայնագրերով: Հայաստանը հանդիսանում է նաև մի շարք միջազգային ներդրումային պայմանագրերի մասնակից կողմ։ Երկիրը ներդրումային վեճերի կարգավորման միջազգային կենտրոնի (ICSID) անդամ է և վավերացրել է Միավորված ազգերի կազմակերպության Միջազգային առևտրային իրավունքի հանձնաժողովի (UNCITRAL) Օտարերկրյա արբիտրաժային վճիռների ճանաչման և կատարման մասին կոնվենցիան (1958 թ. Նյու Յորքի կոնվենցիա): Ավելին, Հայաստանը ներդրումային դրույթներ պարունակող յոթ միջազգային պայմանագրերի և երկու տարածաշրջանային համաձայնագրերի մասնակից կողմ է. դրանք են՝ Եվրասիական տնտեսական միության մասին պայմանագիրը և Ներդրողների իրավունքների պաշտպանության մասին Անկախ պետությունների համագործակցության կոնվենցիան: Հայաստանը նաև հանդիսանում է Էներգետիկ Խարտիայի պայմանագրի կողմ, որը ևս ապահովում է օտարերկրյա ներդրումների պաշտպանություն և ներդրող-պետություն վեճերի կարգավորման մեխանիզմների հասանելիություն: